Eid gah say hum takreeban 1 bajay tak farig ho gaye or phir socha k ab hotel ja k kuch dair aram kerna chahiya q k garmi ki shiddat bohot thi or 3 bajay tak Bahawalpur ki taraf bhi nikalna tha. Lehaza hotel aye fresh huye, araam kiya or 2.30 bajay k kareeb nikalnay ki tayyari ker k 3 bajay tak Bahawalpur ki taraf safar ka aghaaz ker diya.
Bahawalpur ka safar takreeban 100km ka tha jo k koi itna lamba safar nhi hai lakin garmi ki jo shiddat thi us nay baihaal ker diya tha. Plan yeh kiya tha k Bahawalpur thora timely pohncha jaye or shehar k andar jo jaghain hain un ko aaj rat ko hi daikh liya jaye. Lehaza rastay ma tasveerain bnanay k liya nhi rukay or vaisay bhi jab sar pay dhoop ho to kaheen ruknay ko dil nhi kerta.
Rastay ma kisi jaga say lunch kiya or us k sath hi aik qulfi vali dukan thi jis say yeh mazay ki qulfi khai. Maloon nhi yeh dukandaar sb logon ko qulfiyan aisay hi paish kerta hai ye humain door say aye mehmaan samajh k presentation achi bnai.
Bahawalpur jatay huye Satluj toll plaza say bilkul pehlay left side pay aik restaurant hai. Us k bahir board likha hua ha "Charsi Chaye". yeh board daikh k socha try kerni chahiya chaye yahan ki. Rang say to chaye bohot achi lag rahi thi lakin zaiqa kuch khaas nhi tha.
Hum takreeban 6.30 bajay Bahawalpur pohonch gaye or sb say pehlay hotel daikha jo k city k kaheen darmyan ma ho ta k har jaga pohonch asaan ho. Room liya or fresh ho k 8 bajay tak Bahawalpur ki mash-hoor jagah "Noor Mahal" daikhnay nikal paray. Rastay ma humain "Bab-e-Fareed" nazar aya jo k raat ki lighting ki waja say bohot khubsurat lag raha tha. Hum is ki pictures bnanay k liya ruk gaye.
Bab-e-Fareed ki pictures bana k hum Noor Mahal ki taraf chal paray or takreeb 8.45 tak vahan pohnchay to pta chala k light show to khatam ho chuka hai. Behar haal hum phir bhi tickets lay k chalay hi gaye. main ground ma pohonch k kya daikha k itna rush logon ka jo Noor Mahal k andar janay k liya intizaar ker rahay thay. Noor mahal building k gumbad (dooms) ki lights bhi band ker di gai theen. jin k baghair pictures jaisay na mukammal lag rahi theen. Hum nay kuch dair vahan intizaar kiya k loogon ka rush kam ho to hum andar jayen. Lehaza kuch dair baad andar gaye to andar abhi bhi bohot say loog thay or intihai garmi ki waja say building k andar bohot habs thi jis ki waja say saans laina mushkil ho raha tha. Lehaza hum nay bahir aa jana hi behtar samjha or bahir say hi kuch tasaveer bna k wapis hotel ko chal paray or plan yeh kiya k kal subha dobara visit krain.
Q k lunch late kiya hua tha is liya bhook zyada nhi thi. to socha k shake pee laitay hain or dahi bhalay kha laitay hain. Lehaza Noor Mahal say wapsi pay hum Ahmadpuri Gate pay rukay or vahan aik dukan say Dahi Bhalay mangvaye.
Presentation daikh k to yun laga jaisay 2 plates or mangvani parain gi lakin aisa bilkul na hua. Hum say pehli plates bhi aadhi khatam na hui. Bohot taiz masala or itni khataas thi daant chitakhnay lag gaye. Hum nay vaheen plates choor di k zabardasti khatam ki to kaheen subha tak ham donon k galay hi na band ho jayen. Shake piya jo k behtareen tha or phir wapis hotel ho chal diya.
Yahan pay hamara dusra din bhi ikhtitaam ko pohncha.