Originally published at: https://www.pakwheels.com/blog/urdu-yamaha-suzuki-bikes-sales-feb-2019/
پاکستان آٹوموٹِو مینوفیکچررز ایسوسی ایشن (PAMA) نے موٹر سائیکلیں بنانے والے اداروں کی موٹر سائیکل فروخت رپورٹ جاری کردی ہے، جو یاماہا اور سوزوکی کے لیے بہت اچھی لگتی ہے جبکہ یونائیٹڈ آٹوز کی فروخت کم ہوئی ہے۔
PAMA کے مطابق یاماہا پاکستان نے فروری 2019ء میں 2,271 موٹر سائیکلیں فروخت کیں جبکہ جنوری میں اس نے 1,675 موٹر سائیکلیں بیچی تھیں۔ یہ ماہانہ بنیادوں پر 36 فیصد اضافہ ہے۔ جبکہ سال بہ سال میں فروخت 51 فیصد سے بھی زیادہ ہوئی ہے۔ یاماہا کے علاوہ پاک سوزوکی نے فروری میں 1,951 یونٹس فروخت کیے جبکہ جنوری 2019ء میں یہ تعداد 1,874 تھی۔ یہ فروخت میں 4 فیصد اضافہ ہے۔
اب پاکستان میں موٹر سائیکلیں بنانے والے سب سے بڑے ادارے اٹلس ہونڈا کی طرف آتے ہیں جس نے فروری میں 95,015 موٹر سائیکلیں فروخت کیں اور جنوری میں ادارہ 95,009 یونٹس بیچ پایا تھا۔ ڈیٹا واضح طور پر ظاہر کرتا ہے کہ فروخت میں کچھ اضافہ ہوا ہے، لیکن اگر ہم سال بہ سال دیکھیں تو فروخت میں 12 فیصد اضافہ ہوا ہے۔ ہونڈا، سوزوکی اور یاماہا سے ہٹ کر ملک میں موٹر سائیکلیں تیار کرنے والا دوسرا سب سے بڑا ادارہ یونائیٹڈ فروخت کے معاملے میں کچھ اچھی کارکردگی نہیں پیش کر رہا؛ ادارہ فروری میں 22,293 موٹر سائیکلیں فروخت کر پایا جو پچھلے مہینےکے مقابلے میں 7,144 موٹر سائیکلیں کم ہیں۔ جنوری میں یونائیٹڈ آٹوز نے 29,437 موٹر سائیکلیں بیچی تھیں۔ یہ ماہانہ بنیادوں پر 24 فیصد کمی ہے۔
مزید دیکھیں تو راوی اور DYL موٹر سائیکلز نے فروری 2019ء میں بالترتیب 1,906 ور 224 موٹر سائیکلیں فروخت کیں۔ مزید برآں، مقامی سطح پر بننے والی گاڑیوں کی فروخت بھی فروری 2019ء میں 13 فیصد کم ہوئی۔ جنوری 2019ء میں کل مسافر گاڑیوں کے 19,353 یونٹس فروخت ہوئے تھے، جبکہ فروری 2019ء میں صرف 17,071۔
واضح رہے کہ غیر مستحکم معیشت اور آئندہ سال میں آٹو انڈسٹری کی کارکردگی اچھی نہ ہونے کی پیشن گوئی کے باوجود موٹر سائیکل انڈسٹری نہ صرف پھل پھول رہی ہے بلکہ مضبوط ہوتی جا رہی ہے۔ دیکھتے ہیں کہ آئندہ مہینوں میں اس کی کارکردگی کیسی رہتی ہے۔
ہماری طرف سے اتنا ہی، اپنے خیالات نیچے تبصروں میں پیش کیجیے۔